BHEEGE SE

Bheeni si baarish mein
Do log jaa rahe the
Log do the par chhaata ek
Ek ne chhaata pakda hua tha
aur doosre ne earphones
Ek ke haath mein phool tha
doosre ke kaano ke peechhe
Jaane kya gunguna rahe the woh
Uss khaali sadak par
Jaise woh raasta sirf unke liye hai
Manzil se beparwaah
Duniya ke shor se door
Kuchh daer woh sang chale
Fir doraaha aa gaya
Aur baarish bhi tham gayi
Kaano ke peechhe se phool gir gaya
Par earphones ki dor ulajh ke reh gayi